Intro
Nos konosé diferente tipo di krísis òf kalamidat. E diferente krísis òf kalamidatnan tin diferente durashon i no semper bo por premirá esaki. Kada krísis òf kalamidat ta rekerí un otro manera di aktua pa salbaguardiá e bienestar di bo bestia di kas. Importante ta ku ora di tuma medidanan di preparashon pa un krísis òf kalamidat tene kuenta ku bestia di kas tambe. Den e siguiente sekshon bo por haña algun stap di kon pa salbaguardiá e bienestar di bo bestia di kas den kaso di un krísis òf kalamidat.
Kiko bo por hasi?
Stap 1: Regla un kaminda sigur pa bo bestia di kas
Regla un kaminda seif pa bo bestia di kas den kaso ku bo tin ku evakuá bo kas. NUNKA NO LAGA BO BESTIA DI KAS ATRAS. Si un situashon no ta sigur pa bo mes persona e ora ei e no ta seif pa un bestia di kas tampoko. Nota ku shèlters na Kòrsou ta solamente pa hende i no ta aseptá bestia di kas. Ta importante pa bo tin un lugá stipulá kaminda bo por laga bo bestia di kas dado kaso ku surgi un krísis òf kalamidat i bo tin ku evakuá bo kas.
Kon bo por prepará bo mes?
– Tuma kontakto kubo veterinario pa un lista di ‘opvangcentrum’ pa bestia di kas.
– Puntra na ‘dierenasiel’ si nan ta provení ‘opvang’ pa bestia di kas den kaso di un krísis òf kalamidat.
– Puntra famia òf konosí si den kaso di un krísis òf kalamidat nan por provení ‘opvang’ pa bo bestia di kas.
Stap 2: Skohe un ‘care taker’
E stap aki ta importante na momento di un krísis òf kalamidat. Na e momento ku bo tin ku skohe un ‘care taker’ temporal pa bo bestia di kas, konsiderá un hende ku ta biba den bo bisindario. E persona en kuestion mester ta unu di konfiansa i mester tin akseso na bo kas. Alabes e persona mester ta na kas pa sòru pa e kuido di e bestianan. Un ‘care taker’ lo funshoná bon ku un persona ku tambe tin bestia di kas p.e. un bisiña i kisas por repartí e responsabilidat.
Stap 3: Prepará ‘Emergency Supplies’ i kit pa biaha
Si bo tin ku evakuá bo kas semper tene kuenta ku e ‘worst-case scenario’. Asta si bo ta kere ku ta pa un par di dia lo bo ta for di kas, no ferwagt ku lo bo haña pèrmit pa regresá bo kas pa un par di siman. Ora ta ser indiká pa evakuá sigui e instrukshonnan di e personanan ku ta na enkargo. Ora di evakuá tuma e siguiente puntonan na kuenta:
Puntonan di konsiderashon
• Sòru pa tur bestia tin un banchi ku nan nòmber skibi.
• Hinka bo bestia den kas si tin aviso di tormenta, krísis òf kalamidat. Bestianan por desorientá den kaso di un krísis òf kalamidat i pèrdè kaminda pa kas.
• Warda un pakete di emergensia ku faha pa bo bestia si esaki ta alkaso mas serka ku ta posibel banda entrada di bo kas. Ademas sòru ku tur miembro di bo famia sa unda e pakete di emergensia pa bestia ta. Ta di sumo importansia ku e pakete di emergensia ta fásil pa transportá i ku esaki ta kompakto.
E pakete di emergensia ta konsistí di e.o.
– Kit i guia di EHBO (puntra bo veterinario kiko esaki ta enserá)
– Kuminda den bleki pa 3-7 dia
– Baki pa pushi
– Towel
– Habon pa laba tayo i desinfektante
– Saku di sushi
– Baki di awa i kuminda pa bestia di kas
– èkstra halsband òf tuigje i un èkstra liña
– Fotokopia di e dosié médiko di bo bestia
– Remedi pa bo bestia di kas
– Un mínimo di awa den bòter pa 7 dia pa kada persona i pa bestia den kas
– Un manera di transporte pa kada bestia si esaki ta nesesario
– Fleshlait
– Deken
– Speshal pa pushi: kos di hunga, slopi di kusinchi
– Speshal pa kachó: Extra leiband i kos di hunga
Atenshon speshal pa kabai
Pa kabai ta di sumo importansia pa nan ta kustumá pa bisti un ‘halster’ i uzo di un trailer. Ta importante pa bo trein bo kabai pa e drenta i sali for di e trailer pa esaki bai sin niun problema den kaso di un evakuashon.
Si bo ta dispone di un trailer ta di sumo importansia pa inspekshoná esaki regularmente. Alabes ta importante pa e vehíkulo ku ta ser uza pa trèk e trailer ta adekuá pa transportá bo kabai. Semper kontrolá ku e trailer ta bon di ‘koppel’ na e vehíkulo.
Ta importante pa bo tin bon kontakto ku otro persona den bo bisindario ku tambe tin kabai. Den dado di kaso ku mester evakuá boso lo por duna otro un man.
Atenshon speshal pa para
– Paranan mester ser transportá den un kouchi speshal pa para.
– Sòru pa bo tin un bòter yena ku awa, pa periódikamente bo mantené e plumanan di bo para húmedo.
– Sòru pa e kouchi di e para ta pone na un lugá trankil.
– Ta di sumo importansia ku e paranan ta haña kuminda riba un base diario. Kumprando un ‘getimede voederbak’ por yuda den e kaso ku bo tin ku evakuá Laga bo para atras.
– Item ku bo mester tin na alkanse den un krísis òf kalamidat ta: Nèt, sèrbètè i ‘deken.
Atenshon speshal pa reptil
Un kolebra por ser transportá den un slopi di kusinchi temporalmente durante un krísis òf kalamidat. Na e momento ku yega na un lugá seif tin ku sòru pa un kouchi apropiá pa e kolebra. Otro tipo di reptil por ser transportá manera a ser menshoná na e pida di para.
Atenshon speshal pa bestianan chikí
Bestia chikitu manera ‘hamster’, ‘cavia’, raton i konènchi mester ser transportá den un ‘drager’ huntu ku nan kuminda i nan baki di kuminda.
Item ku bo mester tin na alkanse den un krísis òf kalamidat ta: Awa, un kahita chikitu/ ‘buis’ i ‘salt lick’.
