Bo no por plania un kalamidat, bo por prepará p’e si!
Prepará
Bo no por premirá un kalamidat, pero bo por prepará pe si!
Plania
Envolví bo famia ora bo ta plania kiko pa hasi den kaso di un kalamidat
Keda Informá
Mantene bo mes na altura di tur akontisimento, notisia i informashon.
Numbernan di
Emergensia
Radio di Emergensia
97.9 FM
Nòmbernan ofisial pa temporada di orkan 2022
Alex
Bonnie
Colin
Danielle
Earl
Fiona
Gaston
Hermine
Ian
Julia
Karl
Lisa
Martin
Nicole
Owen
Paula
Richard
Shary
Tobias
Virginie
Walter
Siklon Tropikal
Un siklon tropikal ta un sistema organisá ku ta wòrdu formá dor di nubianan di welek ku bos
ku ta drei rònt di un sentro. E tin un sirkulashon será na nivel abou i ta forma riba laman òf osean tropikal òf subtropikal. Riba hemisferio nort di Tera, e sistema aki ta drei kontra di weizer di oloshi na nivelnan mas abou i den direkshon di weizer di oloshi na nivelnan mas haltu di atmósfera.
Osean Atlántiko i Laman Karibe su temporada ta kuminsá 1 di yüni i ta terminá 30 di novèmber. Siklonnan tropikal ta ser yamá na diferente manera, dependé na unda nan a forma. Un siklon tropikal ku forma riba Osean Atlántiko ta wòrdu yamá un orkan, miéntras ku unu ku forma riba Osean Pasífiko Oksidental ta wòrdu yamá un Taifun.
Por klasifiká siklon tropikal den tres kategoria, a base di su bientunan máksimo sostené. Esakinan ta:
Depreshon tropikal – ku bientunan máksimo sostené di ménos ku 62 km pa ora.
Tormenta Tropikal – ku bientunan máksimo sostené entre di 63 i 118 km pa ora.
Orkan – ku bientunan máksimo sostené di mas ku 119 km pa ora.
Kon un Siklon Tropikal ta forma?
Tin diferente kondishon ku mester ta presente pa un siklon tropikal por forma. Esakinan ta:
- Laman kalor (por lo ménos 27°C) te sierto profundidat;
- Atmósfera instabil;
- Bientunan relativamente suak na nivelnan mas haltu di atmósfera i
- Un disturbio na nivel abou ku ya kaba ta eksistí, manera por ehèmpel un ola tropikal.
PELIGER
Storm Surge i Resake — “Storm surge” ta laman ku ta ser pushá riba kosta dor di e bientunan
ku ta rondoná un orkan. Hopi bia resake tambe por sòru pa laman brutu, ora e yega serka di
kosta.
Bientu, Ráfaga i Skual — Orkannan ta konosí pa nan bientunan sostené duru ku ta kousa hopi
destrukshon. Nan por generá tambe ráfaganan di bientu di durashon kòrtiku i tambe momentunan mas largu di oumento di bientu ku yama skual i ku ta asosiá ku rabu (spiral band) di un orkan.
Áwaseru Fuerte — Un siklon tropikal por sòru tambe pa áwaseru torensial , ku por kousa
inundashon. Un tormenta tropikal ku ta move poko poko por kousa mas daño debí na
inundashon ku un sistema ku ta move mas lihé.
Promé ku mal tempu:
- Sòru pa tin un plan di akshon na kas pa den kaso di un menasa
- Palabrá ku kada persona ku ta biba den bo kas kon boso mes plan di emergensia ta hinká den otro;
- Splika muchanan tambe kiko por sosodé na un manera komprendibel pa nan.
- Sòru pa tin kuminda ku no ta daña i sufisiente awa pa bebe pa tres (5) dia.
- Kòrta palu i mata rònt di kas i limpia bo kurá ya ku esakinan por kousa daño na bo kas.
- Kumpra plywood i otro material pa protehá bo kas.
- Sea konsiente di e lokalidat di bo kas i si esaki ta den un área ku sa inundá dor di áwaseru fuerte òf laman haltu
- Sòru pa bo tin un pakete di emergensia ku lo ta nesesario den bo kas.
- Kontrolá e pakete di emergensia i ekipo ku ta usa bateria manera radio, flèshlait i telefon selulary.
- Sòru pa bo tin bo telefòn selular semper kargá.
- Sòru pa tin bateria den kas.
- Revisá bo pólisa di seguro.
- Keda vigilá e boletin di pronóstiko di tempu emití dor di MDC via radio, televishon òf www.kalamidat.cw
Durante mal tempu:
- Durante e evento sigui skucha radio i televishon, pa asina sigui e boletinnan emití dor di MDC òf www.kalamidat.cw
- No sali bai riba kaya òf subi laman, si a deskonsehá esaki.
- Si tòg pa un motibu òf otro bo mester sali for di kas, bai ku sufisiente kuminda, awa, deken, èkstra paña pa bisti i bo telefòn selular bon kargá.
- Si bo topa ku un área ku ta inundá, bira bèk, no pasa dor di esaki ya ku bo por hoga.
- Te kaminda bo mes por, trata na resolvé kualke daño promé ku yama timnan di reskate. Esaki ta evitá ku e liña di emergensia ta keda okupá konstantemente loke por stroba esnan den mas nesesidat.
https://youtu.be/l-yBTPEv4Cc5
Efektonan di un orkan por ta grave pa bo kas si bo no tuma prekoushon. Gobièrnu tin un Direktorado di Kontrol di Riesgo i Maneho pa Kalamidat instalá, kaminda tur instansia i servisio nesesario sa kiko pa hasi ora tin peliger, durante i despues di un orkan. E representantenan di e organisashon aki ta reuní regularmente, ta sigui desaroyonan lokal i internashonal i ta yuda avisá gobièrnu tokante e pasonan ku mester tuma.
Gobièrnu ta prepará lugánan pa keda (shèlter) pa esnan ku ta kore peliger den nan mes kas. Tambe gobièrnu ta duna informashon i den kaso di orkan, ta alarmá tokante e gravedat di e orkan. Pero ta bo mes tin e obligashon di informá bo mes i bo famia delantá i tuma e prekoushonnan nesesario den kaso di orkan.