Preparashon pa Temporada di Orkan 2016

kala

Manera ta konosí temporada di orkan ta kuminsá di 1 di yüni te ku 30 di novèmber. Den e periodo akí e chèns ta grandi ku Kòrsou por hañele ku molèster i situashonnan di alerta pa ku mal tempu.

Directie Risicobeheersing & Rampenbeleid (DRR) ta e direktorado den ministerio di Asuntunan General, ku ta duna atenshon na tur lokual mester pa garantisá i salbaguardiá na un manera efektivo i efisiente, bida, kontinuidat sosial, medio ambiente i vienes di pais Kòrsou, promé, durante i despues di un krísis òf kalamidat. Nan ta enkarga k’e responsabilidat pa apliká e lei pa kalamidat, Landsverordening Rampenbestrijding.

Den su afan pa halsa e seguridat di habitantenan i minimalisá e konsekuensianan ku e temporada aki por trese kuné, koleganan di DRR konhunto ku algun kolega di e ‘rampenbestrijdingsorganisatie’ (RBo) a partisipá na e ‘National Hurricane Conference’ di 21 te ku 24 mart na Orlando.

E meta di e ‘National Hurricane Conference’ tabata pa haña i gana mas konosementu riba tópikonanan ku tin deber ku orkan e.o. pa ku preparashonnan, mètodo pa reakshoná mas lihé, limitigashon di e konsekuensianan, salvaguardá bida, vienes i komunikashon. E konferensia tambe tabatin komo meta interkambiá di idea i eksperenshá ku koleganan den region di e.o. Bahamas, Puerto Rico, Bermuda i Merka.
E maneho di DRR ta pa dediká mas i mas atenshon na prevenshon, preparashon i limitashon pa kualkier krísis òf kalamidat ku por sosodé na Kòrsou. Esaki ta konta tambe pa riesgonan di orkan. DRR ta sigui ku e preparashonnan pa no solamente e temporada akí, pero tambe pa e hopi otro temanan riesgoso ku nos por haña nos mes kuné manera e.o. derame di Krudo (oilspill), pániko masal, terorismo, eksploshon i mas.

Importante tambe ta pa habitantenan ta konsiente di lokual nan mes por hasi den un situashon di alerta manera orkan dor di p.e. tin un plan di kalamidat, tin un pakete di emergensia, prepará i limpia bo kas/kura pa temporada di orkan.

 

Bishitá i like nos paginá di FB: www.facebook.com/RisicobeheersingCuracao

Download e app: kalamidat den App store òf Google play, pa bo ta bon prepará i keda bon informá!

Promé ku tira vürwèrk informa bo mes!
Sigui lesa »